يا قصيرنا متسكوتيش

يا قصيرنا متسكوتيش


يا قصيرنا علّي صوتك
و اكسري حاجز سكوتك
و اسألي .........؟
همه ليه ولادك باعوكي بالرخيص
هو ليه فيكي الغريب
جاي يبرطع ...... جاي يهيص
يا تري يا قصيرنا عايشة
و لّا جايز ......
موتوكي فطيس

يا قصيرنا ......
فاكره ناسك الغلابة الطيبين
كانوا م الفجرية يصحوا
و ف المناجم شقيانين
طب لسه فاكره الصيادين
رزقهم اليوم بيومه
و ف تعبهم مرتاحين

فاكره زمان .......
و بيبان بيوتنا مفتّحه
م العشا ... لحد الضحي
كنا حاسين بالأمان
حتي في عز الشتا
كنتي يا قصيرنا دفا

فاكره لما ........
الميه كانت بالصفايح
مكانش عيبة ....
و لا فضايح
كنا يمكن شقيانين
بس كنا مبسوطين
و النهارده ......
قسموا أرضك شرايح
وزعوها ع الحبايب
اللي حاضر .... و اللي غايب
و ع الغلابة .....
طبقوا كل اللوايح

يا بلدنا دول باعوكي
بأي وش ....
باعوا كل شبر فيكي
خلّوا طيرك مالو عش
يا تري حبّوكي فعلا
و لّا كله خداع .... و غش

يا قصيرنا متسكوتيش
و اقطعي ايدين الفساد
درس ليها متسرقيش
و اشرقي شمس الحقيقة
متغربيش.....
و انتي يا قصيرنا تعيشي
و تسلمي و ناسك تعيش




اهداء : شاعر المنتدي

شعرجميل جداااااااااااااااااااااااااااااااااااااا يا اشرف

عمو اشرف اسفة لأننى لم الاحظ العمر

صح لسانك ياأشرف
وياريت تبدأ تحضر في القصيده الجايه علشان تحمس الشباب أكتر
في أنتظارك
أبوأحمد

شكرا لمروركم و انتظروا المزيد قريبا ان شاء الله

كفاية يا عمدة انك بتحبها و بتخاف عليها .....