مصر أم الدنيا

من طرف **عماد الدين** الإثنين 20 ديسمبر 2010, 5:04 pm

ليييييه مصر ام الدنيا حد يجاوبنى
عشان النيل؟؟؟ طب مهى العراق فيها نهرين والاردن فيها نهر وامريكا فيها انهاااااااااار كتيره محدش قال على امريكا ليه ام الدنيا؟
ولا مره سمعنا شاديه امركانيه بتغنى هى ام الدنيا امريكا او الاردن او ..او...او

كل ماحد يتكلم عن مصر يقولك النيل والاهرامات طب ايه تانى ...
ناسها الطيبين.المزلولين..المطحونين وفى المواصلات متكربسين
السؤال ده دايما بيجى على بالى كتيييير

هى ليه مصر ام الدنيا؟
يمكن لما بشوف راجل عجوز شادد عربيه كارو صغيره عليها شوية خص او جرجير اوشوية تين شوكى اخر النهار منهك من ومش لاقى حد يشد معاه..مش العربيه انا اقصد يشد معاه همه
يمكن لما بشوف امرأه عجوز مسنه تتسول فى الاشارات لا تجد من يعولها او من يضمن لها عيشه كريمه
(اقصد ولا مؤاخذ التكافل الاجتماعى – معلش هو لفز اصبح عيب اليومين دول بس محدش يزعل منى)
يمكن لما بلاقى طفل مشرد نايم جنب اى صندوق قمامة او تحت كوبرى
يمكن لما بلاقى الشعب راكب اتوبيس ومدلدل من الباب عشان يروح شغله اللى اصلا يادوب ياكله عيش وشوية فول
يمكن لما بشوف طواااااابير الشباب على اى مصلحة (بيقولوا) بيقولوا انهم عايزين تعيينات وياعينى يصوروا يقدموا الاوراق المطلوبه وبعدين ستك عند خالتك عشان اصلا الاعلان ده معمول عشان المصلحة حتعين حبة ناس عندهم اصلا ومعاهم اساميهم بس لان القانون بيقول مفيش تعيين بدون اعلان فى جريده رسميه

مصر ام الدنيا ليه
عشان معدش اى ورق حكومى ماشى بدون اكراميات
(اصل كلمة رشوه اتلغت من القموس اللغوى)
ولا عشان الناس معدتش بتلاقى حقها الا لو صوتها على وعملت شغب
(قديما كانوا بيسموها مظاهرات).
اللى عايز الميه ترجع له يتظاهر وتيجى الصحافه والتليفويون يصوروا والغريبه ان المشكله غاليا ما تتحل طب كنتوا فين يا مصريين يا مسؤولين يا ابناء ام الدنيا من زمان ولا لازم نعريكم ادام الناس..واللى يغيظ ان المسئول يطلع يقول كله تحت التحكم وماشيين فى حل المساله وكلها 10 ايام والميه ترجع او الرشاح يتغطى او الكهربه تتصلح او اللى اتشردوا حنسكنهم
طب اشمعنه 10 ايام؟؟؟اعتقد على ما الجمهور اللى شاف المأساه ينسى الموضوع ويكونوا لقيوا مأساه جديده تلهيهم (وهلم جرا)
برده مصر ام الدنيا لييييه
عشان عسكرى المرور واقف اللى يلاقيه واقف صف تانى ويديله حاجة اسف اقصد اكراميه يقوله بغضب مصطنع
(شهل شويه عشان الطريق)
واللى ميدفعش ياخده مخالفه؟؟
عشان التامين الصحى اللى حيتباع والغلبان العيان يرزع دماغه فى اتخن حيط
(يمكن دماغه تخف وتتحل؟)
طب ولما يتباع زى كوووول المصالح والشركات اللى اتخصخصت ياترى فلوسها بتروح فين؟؟السؤال ده بالذات تقريبا من صعوبة حله لغوه من كل المقررات الاخباريه والحوارية والدستوريه والبرلمانيه والحزبيه وحتى الملوخيه بالتقليه

مصر ام الدنيا ليه؟؟
ياترى الدنيا اللى فيها امريكا بسطوتها واروروبا بتقدمها وشرق اسيا بتفانيهم والصين واللى عملوه والمانيا اللى قامت بعد الحروب العالميه وبقت من الدول العظيمه فيما لا يتعدى 60 سنه وماليزيا والطفره الاقتصاديه والانجاز اللى حققوه فى 25 سنه
ياترى الدنيا اللى فيها كوووول الدول دى برده لسه مصر هى امها؟؟؟؟

مصـــــــر أم الدنيــــا ليـــــــــه

لم تذكر أمريكا ولا الأردن 3 مرات فى القرآن

لم يذكر رسولنا الكريم أمريكــا و لا الأردن و لكن قال صلى الله عليه و سلم

اتخذوا من مصر جندا فهم خير أجناد الأرض

لم يقال إلى أمريكا أوالأردن

إدخلوها بسلام آمنين

علشان كده مصر أم الدنيا

المفروض نقول إيه بقى

ليه الحوش و الكلاب بيسيئوا لمصر الدنيا

البلد ملهاش دعوة

العيب على اللى فيها

مصر أم الدنيا

مصر أم الدنيا

رد: مصر أم الدنيا