مين هيجر عربيات الكارو بعد منك يا حمار

من طرف **المدير العام** الإثنين 10 مايو 2010, 9:21 pm

من منطلق حرص الدوله على توفير العمله الصعبه وافقت الدوله مشكوره على تصدير 7300 قطعه جلد من جلود الحمير

بس مش دى المشكله . المشكله راحت فين لحوم 7300 حمار دول
وزاره الزراعه مش عارفه اللحمه دى راحت فين ولا حتى الجهات الرقابيه البيطريه
فتحى سرور مش عايز يناقش الامر فى البرلمان قال ايه عشان سمعه مصر
رئيس الوزراء مش عايز يرد ولا يعقب
طيب وبعدين
نروح نسأل بتوع الكباب والكفته و الشاورمه يمكن نلاقى عندهم الرد

طيب بقى فاضل ايه تانى ناكله ؟

قمح مفيش وبنستورد
اللحمه داخل فيها لحمه حمير وهنهق قريب
الفراخ انفلونزا الطيور وكمان فراخ المطاعم بتاخد هرمونات
السمك عملوله مزارع وبقى من غير طعم ولا لون
والفاكهه لعبوا فى الجينات الوراثيه وحبه العنب بقت قد التفاحه وملهاش طعم

طيب ايه المطلوب مننا كشعب مغلوب على امره من اسوأ نظام حكم مصر فى تاريخها من ايام الملك مينا
نظام قدر وبتمكن من انه يخلى شعب بحاله يكره الحياه وكل امله يسيب بلده
يعنى حتى بيأكلونا لحمه الحمير ومش عايزنا ناكلها واحنا مش عارفين
لا بيأكلوهلنا وبعد كده بيعرفونا اننا كلناها . والله ماشفت ازلال لكرامه شعب واحساسه اكتر من كده

وكل واحد يخلى باله بقى بعد كده لما ميبقاش فيه لحمه حمير ناكلها ويبقى فيه ازمه
احنا اللى هنجر العربيات الكارو