عفريت فانوس هذه الأيام

[/center]عفريت فانوس هذه الأيام
لقيت الفانوس مرة ودعكته
طلعلى عفريت قاللى شبيك لبيك
قلت خلاص الذل انا ودعته
ويا عفريت بالطلبات هاهريك
قالى هـــأوأو يا انسان
دأنا عفريت مارد ابن جان
مايهمنيش مكان و لا زمان
واطلب و وأنا عندى البرهان
قلتله عاوز قمح زُرع فى مصر
ومسؤولين يبطلوا فشر
وحكومة متعصرنيش عصر
ومرتب يكفى لآخر الشهر
وعاوز عيش بدون طوابير
وإنفاق حكومى بدون تبذير
وانتخابات من غير تزوير
ورئيس سابق اشوفه كتير
وعاوز فى بيتى شيكارة دقيق
وسبب مقنع لأى حريق
ومجلس شعب بدون تصفيق
وفى كأس العالم لينا فريق
وعاوز مرة ازور شرم الشيخ
وصابعين كفتة م اللى فى السيخ
واشرب مرة عصير بطيخ
واخرج من القسم بدون تلطيخ
ونفسى الضحكة ترجع تانى
وحتة لحمة كندوز او ضانى
وجنيه مصرى زى البرانى
ورصيف للمشى انا وخلاّنى
رد العفريت عليا بغشم
وقال يامصرى ماكنش العشم
بص .. انا ممكن انقل لك الهرم
واسد لك الاوزون اللى اتخرم
وارجعلك الاكل اللى اتهضم
وتمأمأ البقرة زى الغنم
واعملك قصر من العدم
واقولك معنى شرم برم
بس طلباتك طلبات ملحوس
عقله خلاص أكله السوس
ده تخطيط ياابنى ومدروس
انك تعيش على طول موكوس
واحنا بناخد منكم دروس
ازاى نخلى الجن متعوس
وياريت ترجعنى تانى الفانوس
وزى بعضه أعيش محبوس
بدل ما اخرج واتبهدل زيك
ويتلم موكوس على متعوس

حلوة  حتى العفاريت احتارت في اللي بيحصلنا يبقى كتر خيرنا 
شكرا طائر الليل الحزين  وننتظر المزيد

شكرا على الاهتمام والرد

الشكرلله

واتبهدل زيك
ويتلم موكوس على متعوس
ومشكور الفانوس ههههههههههههههههههههههههههههههه