يـومـيـــات ♥♥♥ الـمــواطـــن حـنــفـــى ♥♥♥

أعـــــــزائــــــى أعــضـــاء و مُشــــرفــيـــــــــن و زوار الـمـنـتــــدى الـكــــــرام

يُســعـــــد و يـســـــــــر مُــنــتــــديــــات الـقــصــيــــر الـبـحـــر الأحـمـــر

أن تُــقـــــــــــدمـ لــكـــــــــــم

الـمـسـلســـل الـكُــومـيـــــدى

يـــــــوميـــــــــــــــــــــات الـمــــــــــواطــــــــــن حـــنـــفـــــــــــى

مــع أطــيــب الأمــنــيــــــات بــقــضـــــــــاء وقـــــــــــت مُـمــتـــــع مــعــــنـــــــا

[ندعوك للتسجيل في المنتدى أو التعريف بنفسك لمعاينة هذه الصورة]

الحلقة الاولى : فى البيت

(حنفى نازل الشغل الصبح بدرى )

الزوجة : انت نازل الشغل ياحنفى ؟

حنفى : لا نازل ألعب كوره ياولية بطلى الاسئلة المتخلفة دى

الزوجة : طب بس براحة عليا شوية ده احنا لسة على الصبح يعنى

حنفى : هو انتى اللى شافك يبقى شاف صبح مش عارف أنا كل يوم الواحد يصطبح بالخلقة دى

الزوجة : استغفر الله العظيم يارب ايه ياراجل انت هو انت راكبك عفريت ولا ايه؟

حنفى : وهو برضه فى عفريت يطيق يقعد فى شقة انتى قاعدة فيها؟

الزوجة : طيب ياسيدى أنا مش هرد عليك هات مصروف الشهر عشان أنا نازلة السوق كمان شوية

حنفى : ليه ؟ هو النهاردة كام فى الشهر؟

الزوجة : النهاردة أول يوم فى الشهر ياحنفى و مافيش ولا مليم فى البيت

حنفى : ياولية هو انتى منبه بيضرب أول كل شهر ؟ مافيش مرة كده تحصل معجزة وتنسى موضوع المصروف ده؟

الزوجة : قصر ياحنفى وهات الفلوس عشان اشوف اللى ورايا

حنفى : والله ياختى مهمة قوى سيادتك والحاجات اللى وراكى مقطعة بعضها ومش لاقية وقت ياعينى

الزوجة : اللهم طولك ياروح ... ياراجل انت هو انت مافيش يوم تعديه كده من غير خناقة

حنفى : وهو انت حد يشوف وشك ومايتخانقش طب ايه رأيك بقى مافيش فلوس النهاردة ويبقى اتصرفى

انتى بقى ان شا الله تعملى الاكل زيت وملح

الزوجة : حنفى

حنفى : ياست بقى بلا حنفى بلا زفت أنا خافى فى داهية الهى يارب أرجع الاقى الانبوبة فرقعت فى وشك.

(وبعدين يرزع الباب وينزل )

واســتـــــــنــــــــــــــــــــونــــــــــــا الــحــلــقـــــــــــــــة الــجــــــــايــــــــــة

من طرف **سمكة القصير** الخميس 24 فبراير 2011, 8:34 am

حلوة يامدير يعني نسيب الخناقات في البيت نلاقيها في المنتدى منتظرين اللي جاي

[ندعوك للتسجيل في المنتدى أو التعريف بنفسك لمعاينة هذه الصورة]

الحلقة الثانية :فى الشارع

(حنفى ماشى فى الشارع بسرعة فخبط ست معدية بكتفه )

الست : حاسب ياحمار

حنفى : ايه قلة الادب دى ؟ ايه حاسب دى ؟

الست : مش تفتح وانت ماشى بدل ما تخبط فى خلق الله كده

حنفى : ياست أنا حر أفتح أقفل عينى وانا حر فيها وبعدين هو حد قالك تمشى فى الشارع

مالتاكسيات مالية البلد أهى و لا هى طولة لسان على الفاضى وبعدين ايه اللى حصل يعنى ؟ كسرتلك ايد ؟ خلعلتلك رجل ؟ فقعتلك عين ؟ و لا هو دلع ومياصة وخلاص ؟

الست :على فكرة انت قليل الادب ومش محترم

حنفى : ياسلام ياختى محسسانى انك انتى اكتشفتى حاجة جديدة يعنى

الست : يعنى انت ترضى تعمل كده مع أختك

حنفى : لا طبعا مارضاش ده لو أختى أنا كان زمانى رميتها تحت الاتوبيس اللى جاى هناك ده

الست: لا , واضح انك مش عايز تجيبها البر

حنفى : أجيبها البر ليه ؟ هو انتى شايفانى فى البحر وعمال أغرق ولا حاجة

الست : أنا مش هأرد عليك لان مستواى وأخلاقى

ما يسمحوليش انى ارد على واحد زبالة كده زيك

حنفى : قولتلك بلاش قلة أدب ؟ ايه زيك دى ؟

الست : روح ياعم الله يهديك

حنفى : ماشى ياختى الله يسهلك الهى يارب وانتى ماشية فى الشارع تعدى من تحت بيتنا تقوم الانبوبة اللى هى هتفرقع فى مراتى تفرقع فيكى انتى كمان ستات آخر زمن

(وبعدين يسيب الست ويكمل طريقه فى انتظار مشكلة أخرى )

و إســتـــنـــــــــونــــــــــا الــحــلــقــــــــــة الـجـــــايــــــــــة

من طرف **عماد الدين** الخميس 24 فبراير 2011, 6:53 pm

فى انتظار مذكرات حنفى مشاكل
جميلة يا عمر

شكرا مرورك الجميل يا عمدة إنت و سمسمة

من طرف **سمكة القصير** الجمعة 25 فبراير 2011, 8:40 am

ده باين عليه بيقول شكل للبيع

و مــــــــع حــنـــفــــى مـــشــــــاكـــل رِجــعـــــــنـــــــا مــن تـــــانــــــــــى

[ندعوك للتسجيل في المنتدى أو التعريف بنفسك لمعاينة هذه الصورة]

الحلقة الثالثة : فى المواصلات

(حنفى واقف فى الشارع مستنى ميكروباص , حنفى لقى ميكروباص جاى من بعيد فشاورله والميكروباص وقف له)

حنفى : رايح مدينة نصر يا اسطى ؟

الكمسرى : ايوه يا أستاذ تعالى .

حنفى : لا ده أنا رايح الهرم , روح انت

الكمسرى : امال بتقول ليه مدينة نصر ياعم انت , ولاهى عطلة وخلاص

حنفى : ياجدع باطمن ان فيه مواصلات لمدينة نصر , يمكن أفكر أروحها فى يوم ولا حاجة , وبعدين أنا حر أسال السؤال اللى أنا عايزه و لا هى الاسئلة بقت بفلوس اليومين دول ولا ايه ؟

(سواق الميكروباص مشى بالعربية بسرعة قبل ماخناقة تحصل بين الكمسرى و حنفى)

(حنفى لقى ميكروباص تانى جاى فشاورله والميكروباص وقف )

حنفى : رايح الهرم يااسطى ؟

الكمسرى : ايوه يااستاذ تعالى

حنفى : طيب معاك مكانين فاضيين ؟

الكمسرى : لا والله معلش يابيه , مافيش غير مكان واحد

حنفى : طيب كويس أنا عايز مكان واحد بس , اصل انت لو كان معاك مكانين ماكنتش هاركب .

الكمسرى (عمل انه ماسمعش حاجة ): انت نازل فين ياأستاذ؟

حنفى : نازل الهرم ان شاء الله

الكمسرى (مبتسما ): خوفو ولا خفرع ولا منقرع.

(بعد كده أدرك الكمسرى انه ارتكب غلطة فادحة لما فكر انه يهرج مع حنفى )

حنفى : لا رايح عند أبو الهول ياخفيف , سمعت انه تعبان فقلت لما أروح اطمن عليه يمكن محتاج حاجة منى كده ولا كده و أو يمكن ابنه الهول محتاج حد يوديه المدرسة أهو زى مابيقولك اعمل الخير وارميه فى وش السواقين ياخفيف.

الكمسرى (مكشر) : الاجرة يا بيه

حنفى : عمال أقولك رايح أزور ابو الهول وباكلمك عن عمل الخير و وانت تقولى الاجرة الدنيا بقت وحشه قوى ياجدعان

الكمسرى : يابيه الاجرة لو سمحت عشان أشوف اللى ورايا

حنفى : هو فيه ايه يا رجالة هى مصر كلها بقت مهمة ولا ايه , كل ما أكلم واحد يقولى خلص عشان أشوف اللى ورايا , حاجة تفقع المرارة , ماتكونش انت والولية مراتى فاتحين شركة مع بعض ولا حاجة

الكمسرى : يابيه الاجرة عشان اليوم يعدى , مش عايزين نضايق على حد

حنفى : ياماما , تصدق اترعبت يا أخى , طب ايه رأيك بقى ان أنا مش دافع الاجرة الا لما أنزل , وكله بالقانون

(حنفى طلع رجل بتاع قانون اهو)

الكمسرى : يعنى انت فارقة معاك قوى انك تدفع لما تنزل عن انك تدفع دلوقتى

حنفى : يا جدع أنا حر أدفع دلوقتى , أدفع كمان ثانيتين , أدفع لما أنزل , أدفع المرة جاية , فلوسى و أنا حر فيها .

الكمسرى : وقف يا أسطى لما نشوف أخرتها مع الجدع ده ايه .

حنفى : آه وماله , وقف يااسطى لما نشوف أخرتها معاكو ايه

( الكمسرى يدخل ايده فى بقه ويطلع موس ويحطه على رقبة حنفى )

الكمسرى : هتدفع ولا تتشاهد على روحك

حنفى : هو حضرتك صدقت ولا ايه , ده أنا كنت بهزر معاك يا أخى يااه , ماكنتش أعرف انك عصبى قوى كده , هى الاجرة كام ؟

الكمسرى : جنيه ونص

حنفى : خد اتنين جنيه اهمة , ياراجل اخزى الشيطان وشيل البتاع ده من على رقبتى أبوس ايدك , ده أنا كنت بهزر والله و وآدى ياعم راسك أبوسها.

الميكروباص كمل طريقه وحنفى قاعد جواه زى الكرسى اللى هو قاعد عليه وحاطط عينيه فى الارض لحد ماوصل لمحطته , حنفى نزل زى الصاروخ وطلع يجرى ناحية أقرب .......حمام

هههههههههههههههههههههههههههههههههههههه

( جــالــه اللــى يــربـيـــه )

و إنــتــظـــــــــــــــرونـــــــــــــــــــا فــى الــحــلــقــــــــة الــرابـــــــعـــــــــــــــة

من طرف **سمكة القصير** السبت 26 فبراير 2011, 9:06 am

يستاهل ده ذنب الوليه مراته اللي عكر دمها على الصبح

من طرف **المدير العام** السبت 26 فبراير 2011, 9:57 pm

و رجعنا من تانى

مع حـنــفــى مــشـــــاكـــــل

و الـحــلــقــــة الــرابــعــــــــــة

يـــــــلا نــشــــــوف حــصـــل إيــــــــــــه

[ندعوك للتسجيل في المنتدى أو التعريف بنفسك لمعاينة هذه الصورة]

الحلقة الرابعة : حنفى بيجيب فطار

حنفى بعد ماخرج من الحمام وحس انه هدى شوية بعد لحظات الرعب اللى عاشها قرر انه يروح يشترى فطار عشان يروح الشغل
و بما ان حنفى مصرى فهو أصلا ماعندوش اختيارات فى فطاره , هو فول وبس ,
حنفى راح على الراجل بتاع عربية الفول اللى بيجيب منه كل يوم

بتاع الفول (بيكلم نفسه ) : ياساتر هو الراجل الرخم ده هييجى كل يوم ولا ايه , ياساتر على الرخامة.

حنفى : ايه ياجدع انت شكلك مش طايق نفسك ليه كده؟ ووشك اتغير ساعة ماشفتنى كده
ليه؟ ماتكنش شفت عفريت ولا حاجة

بتاع الفول : ياريت ياسى حنفى كان عفريت , أصل انا من غير ماخبى عليك ساعة مابشوفك
بحس بانتعاشة كده فى قلبى

حنفى : ليه ان شاء الله , عبيط انت ولا ايه ؟ايه اللى بيخليك تنتعش ياخويا؟

بتاع الفول : أبدا ياسى حنفى أصلهم دايما كان بيقولولى ان أنا مافيش حد فى رخامتى لحد ماعرفتك و اكتشفت ان أنا مجرد تلميذ فى مدرستك

حنفى : طيب ياابو لسان طويل , بطل رغى بقى و اعملى شقتين فول و شقتين طعمية

بتاع الفول : اشمعنى غيرت طلبك النهاردة يا سى حنفى , مانت طول عمرك بتاكل 3 سندوتشات بس

حنفى : الهى ياشيخ تنطس فى نظرك , الهى وانت ماشى تخبط فى شجرة , الهى عصفورة تعمل على دماغك و ماتلاقيش منديل تمسح بيه . هو أنا كنت باكل من جيب أبوك يابنى ولا انا كنت باجى أطفح عندك ببلاش . انت مالك انت , حاجة غريبة والله , هو انت شغال بياع فول ولا مخبر فى أمن الدولة

بتاع الفول : خلاص ياعم حقك عليا , ياساتر ماكانتش كلمة يعنى , باسألك سؤال عادى , أعوذ بالله , طيب ياسيدى هاعملك طلبك وتاكله بالسم الهارى ان شاء الله ( بصوت واطى)

حنفى : بترطم بتقول ايه ياابو لسان طويل

بتاع الفول : ولا حاجة , بقول ربنا يكرمك زى ماكرم غيرك قبل كده

حنفى : طب خلص عشان أنا اتخنقت منك

بتاع الفول : امال انا أعمل ايه , ممكن أسالك سؤال ياسى حنفى ؟

حنفى : اتنيل اسأل

بتاع الفول : هو انت ناوى كل يوم تيجى عندى ان شاء الله يعنى؟؟؟؟

حنفى : مضطر يااخويا , أصلك أقرب واحد للشغل , وهو لو كان فى حد غيرك كنت فكرت أقرب منك أصلا و وهو انت الاكل اللى بتعمله ده يبقى أكل بنى آدمين ده أكل بهايم يابنى بس هنعمل ايه بقى , أدينا صابرين

بتاع الفول : لا , على فكرة يا سى حنفى فى مطعم فتح جديد على أول الشارع , يعنى قريب أوى أوى من هنا والاكل اللى بيبيعه أكل بنى آدمين فياريت تجربه , ويارب تبقى زبون دايم عنده , وربنا يرحمه بقى

حنفى : ماشى يازبالة , هات الاكل اللى هاطفحه عشان أمشى

بتاع الفول : اتفضل أهو يا حنفى بيه شرفتنا ونورتنا و هتوحشنا والله انت ورخامتك

حنفى : نور لما يكهربك , ووحش لما ياكلك , يابعيد

بتاع الفول : ده من ذوقك ياحنفى بيه , ومش بعيد عليك الكلام اللى انت بتقوله ده , و أهو الحاجة اللى مخليانى ماردش عليك , انك ماعدتش هاتيجى التانى

حنفى : ترد عليا , الهى ترد المية فى زورك ياشيخ , يلا فى ستين داهية يابتاع أكل البهايم

( ومشى حنفى بعد ماحرق دم الراجل اللى ساب شغلانته وباع عربية الفول بتاعته واشتغل لميع جزم , واهو كله من تحت راس حنفى )

وانتظروناااااا بكرة والحلقة الخامسة

من طرف **سمكة القصير** الأحد 27 فبراير 2011, 8:55 am

ههههههههههههه انا عايزة حنفي ده علشان يعلي الضغط لوحده معرفه

من طرف **المدير العام** الأحد 27 فبراير 2011, 6:08 pm

مـــــــــــا بــــــــــــــــــــــــــــلاش

يـومـيـــات ♥♥♥ الـمــواطـــن حـنــفـــى ♥♥♥

يـومـيـــات ♥♥♥ الـمــواطـــن حـنــفـــى ♥♥♥

رد: يـومـيـــات ♥♥♥ الـمــواطـــن حـنــفـــى ♥♥♥

رد: يـومـيـــات ♥♥♥ الـمــواطـــن حـنــفـــى ♥♥♥

رد: يـومـيـــات ♥♥♥ الـمــواطـــن حـنــفـــى ♥♥♥

رد: يـومـيـــات ♥♥♥ الـمــواطـــن حـنــفـــى ♥♥♥

رد: يـومـيـــات ♥♥♥ الـمــواطـــن حـنــفـــى ♥♥♥

رد: يـومـيـــات ♥♥♥ الـمــواطـــن حـنــفـــى ♥♥♥

رد: يـومـيـــات ♥♥♥ الـمــواطـــن حـنــفـــى ♥♥♥

رد: يـومـيـــات ♥♥♥ الـمــواطـــن حـنــفـــى ♥♥♥

رد: يـومـيـــات ♥♥♥ الـمــواطـــن حـنــفـــى ♥♥♥

رد: يـومـيـــات ♥♥♥ الـمــواطـــن حـنــفـــى ♥♥♥