علشان أنت مصرى

من طرف **اصغر الامراء** الأحد 21 نوفمبر 2010, 5:55 pm

عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى

عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك

ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله

بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق

هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت

عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ جتك القرف

من طرف **عماد الدين** الأحد 21 نوفمبر 2010, 6:00 pm

استوصوا باهل مصر خيرا فهم واهليهم فى رباط الى يوم الدين
صدق رسول الله صلى الله عليه وسلم

من طرف **المدير العام** الأحد 21 نوفمبر 2010, 6:29 pm

كــــــــــــلام جـمــــيـــــل و واقـعــــى

شكــــــــرا أصــغــــــــر الأمــــــــراء

بس مش علشان انت مصرى أو إنكـ عــايــش فـى مـصــر

عــلــشـان إحــنـــــا راضــيــيــن بــكــده

ومــحـــدش اتكلم مـن زمـــــان
لحــد مــا الـفــســاد كـل يــوم بكتــر أكــتــر و أكــتـــر

من طرف **اصغر الامراء** الأحد 21 نوفمبر 2010, 6:30 pm

احنا سكتين على كدة بردة علشان احنا مصريين

من طرف **المدير العام** الأحد 21 نوفمبر 2010, 6:53 pm

لا و الله

مش علشان مصريين

أى بلد بينسوا ربنا بيحصل فيها كده
مش فى مصر بس

مش عايز أذكرلك أمثلة على بلاد نسيوا لغتهم حتى

يقول الله جل وعلا : { وَلا تَكُونُوا كَالَّذِينَ نَسُوا اللَّهَ فَأَنسَاهُمْ أَنفُسَهُمْ أُوْلَئِكَ هُمُ الفَاسِقُونَ } [الحشر : 19]

صدق الله العظيم

علشان أنت مصرى

علشان أنت مصرى

رد: علشان أنت مصرى

رد: علشان أنت مصرى

رد: علشان أنت مصرى

رد: علشان أنت مصرى